蝙蝠俠總能夠喺適當時機挺身而出，但有別名蝙蝠俠之稱既巴舒亞伊卻沒有哩項特質，加盟車路士經已四年有多，依然碌碌無為，穿起外借球隊波衫既次數仲要比起藍軍為多，由當年被譽為球壇潛力新星變成今日平平無奇既中下游射手，現年二十有七既巴舒亞似乎都難成大器只能擔當山寨王。
四年前巴舒亞伊以接近四千萬歐元由法甲馬賽轉投車路士，以佢今日既身價黎講如果仲有當時既一半都真係執到都偷笑，你可能會問當初點解藍價會肯付出哩個價錢去買佢，最主要原因有兩方面，首先係球員特質，由體格身形上黎睇巴舒亞伊的確擁有強頑既身軀，符合藍軍一直希望尋找又黑又硬既前鋒要求，再者比利時人於馬賽成名時以射門觸角見稱，喺數據層面上單以佢喺法甲最後一個球季（15/16）既數據黎講，成功做出23個入球以及10個助攻雙雙既成績經已吸引一眾潛力買家既目光。
當時巴舒亞伊喺車路士尚未確立新主教練係邊個之前加盟，可見得管理層係相當睇重哩單交易，雖然佢同干地喺首季加盟之下經已奪得英超冠軍，不過哩位比利時前鋒得到既上陣機會並唔算得上多，甚至只能獲得幾分鐘既垃圾時間出場，而主要都係以後備身份接替擔正既迪亞高哥斯達，在於後者既能力同巴舒亞伊之間的確存在明顯差距，比利時人被安排只能作為替補亦屬無可厚非。
但喺完季時迪亞高哥斯達與干地既「信息事件」鬧翻，正當球迷們以為會比到機會巴舒亞伊擔正時球會喺哩個時候換來由皇馬來投既莫拉達，雖然前者既上陣時間有所提升，但都不足以令巴舒亞伊獲得留隊機會，再加上干地喺過去一個球季既時間都並無因應球員特質而定立一套擅於佢去發揮既體系，喺連鎖轉會效應下巴舒亞伊喺季中就以借用身份轉投到多蒙特，換來阿仙奴因為奧巴美揚既加盟而放棄既基奧特。
而巴舒亞伊亦的確喺德甲賽場搵得返過去馬賽效力既光輝歲月，短短半季經已成為陣中正選射手，與馬高萊斯以及當時仲係效力緊多蒙特既佩利錫組成前場三人組，季後更令「蜜蜂軍團」向車路士提出轉會收購，可惜被藍軍一口拒絕，而據報當中主要原因係雙方未能就轉會費達成共識，推斷當時車路士一定係以收返四千萬歐元作為主力目標，相反多蒙特就一定唔會肯用番哩個價錢黎買佢，而之後巴舒亞伊亦繼續以外借身份先後加盟華倫西亞同水晶宮，相比於西甲賽場似乎球員都係偏向適合於德甲發展較多。
直到上季球員至正式得到留隊機會，不過巴舒亞伊並未有把握得到艾巴咸受傷缺陣既機會，更錄得16場英超賽事中只取得一個入球既低效數字，雖然球員大大話話都經歷左四年時間，但佢並因為咁而有好顯注既階段性成長，場上功能依然非常單一只能作最後一射，質素上亦都唔係高，一啲背身二傳、回後策應既多元化職能都仲係缺乏，喺今時今日每隊球隊都要求前鋒全能化既趨勢之下，巴舒亞伊的確唔符合現今足球體系既發展。
喺今次外借水晶宮之前車路士先同球員續左為期一年既短約，最主要原因係避免球員人財兩失，而喺外借條款之中亦有加入水晶宮可作出優先購買既選擇權，老實講要喺巴舒亞伊身上收番當中買佢既一半金額已經係難過登天，只寄望季後水晶宮真係肯出手買斷佢，否則車路士就只會蝕上加蝕，血本無歸。
文章發表時間 : 14/10/2019 11:45
文章最後更新時間 : 14/10/2019 11:45
《原創文章 歡迎轉載 請列明出處 謝謝》