如日中天既曼城作客史丹福橋以1-0小勝車路士，可以話令哥迪奧拿報了上季被干地聯賽雙殺之仇，其中哩場藍軍輸波可分成大慨三個主因，先為上場作客馬體會時現消耗球員過多體力，舟居勞頓之下再連續兩場強強大戰導致全隊體力不繼，再者球隊板凳深度不足，除左後場之外中前場球員未有輪換，最後為比賽早段莫拉達傷出，引致早以埋下敗仗伏線。
．圖片來源 The Sun
要不是後場輪換既魯迪加、基斯甸臣表現出色，加上卡希爾發揮穩定以及古圖爾斯高水準表現，令防線三番四次力阻曼城來襲，否則失球數字絕對唔止咁少。而其中最受關注既係莫拉達受傷離場後，干地選擇換入既竟然係韋利安，此舉可以話令不少車路士球迷不解，意大利人在賽後記者會表示哩個係戰術決定，但究竟韋利安有啲咩特質係佢睇到而球迷睇唔到既呢？
．圖片來源 : Evening Standard
其實巴西人喺近哩幾季表現一直向下沉，前季在球隊整體發揮得唔好既時候，練得一腳好罰球，為當時藍軍拎番唔少「救命分」。到上季，母親不幸離開左佢，而番到球隊後正選位置亦被柏度取代，不過後備上陣亦能交出表現。反而去到今季季初，夏薩特缺席下成為正選，評價都係壞多過好，上腳時間過多同時多次弄失控球權，交波準繩度過低更有不少「醫院波」，好似上場對馬體會後備上場就助攻基沙文直入心臟地帶。
就連自己最拿手既左路罰球，都可以連命中目標都不能，好似沉晚對曼城場波人地只放一位球員作人牆，都可以選擇中牆唔中框，而且推波好多時推向後場，整失左個波之後擺出一副黑面連追都唔追。其實說實話，就算比你係夏薩特，都唔係可以下下失波都唔追下嘛？唔知大家仲記唔記得當初既韋利安係點，唔係話要佢做番薩克達時期能傳善射既巴西快翼，只係話可唔可以唔好咁花巧，做番當初務實啲直接用速度硬爆對手既韋利安。
．圖片來源 : Le Buzz – Eurosport
依加下下用「時間停頓」依一招，其實唔單止減慢左球隊進軍速度，係就連隊友都根本唔知你想幾時交番個波出黎。如此嘔心瀝血既表現，真係諗唔明點解仲會有出場既機會。韋利安自己想改變，但球迷想見到既係以前覆蓋範圍廣闊，下下有波都追既韋利安，而唔係依加變成模仿夏薩特，但無論能力同球商下遠遠都不及得上既韋利安。
文章最後更新時間 : 1/10/2017 14:15
《原創文章 歡迎轉載 請列明出處 謝謝》