仲記唔記得佢？曾經喺時任領隊摩連奴手下得到了首次車路士一隊上陣機會，當時打既位置係中場中，而自上季干地上任後將佢既定位改翼鋒（影子前鋒），由當年被譽為德國中場波歷克既接班人，到今日喺邊路上學得夏薩特似模似樣，似乎同時能夠擔任中場同翼鋒將會係佢將來留喺車路士既最大優勢，亦係令唔少藍軍球迷感到驚喜，佢叫路夫斯捷克。
龍虎切自8歲就加入車路士青訓體系，同期隊友有蘇蘭基、艾巴咸、查路巴、艾基等人，可以話係近年藍軍質素最高既一屆青訓，路夫斯捷克腳法了得，控球同護球能力強，加上擁有高達1米91既身高，而且能夠單人匹馬連人帶波推進一段距離，充分利用到自己既先天優勢以及足球天賦，為各青訓梯隊衝擊一項接一項既青年冠軍，屢獲殊榮，亦一步步為穿上車路士一隊球衣上陣而鋪路。
皇天不負有心人，路夫斯捷克既表現好快就受到當時領隊摩連奴所注視，首次上陣就係以後備身份入替法比加斯，更加係喺歐聯分組賽完成佢既處子戰，相當受外界注目。由於當時藍軍中場人手捉襟見肘，葡萄牙主帥好快將路夫斯捷克提升至一隊效力及參與集訓，亦開始喺各項賽事得到一個又一個既上陣機會，但其實哩位英格蘭新星並非毫無缺點，無論摩連奴定係干地都有批評過佢懶於跑動，經常等波到欠缺積極性，而今季被外借到水晶宮後喺哩方面的確有稍作改善。
季初經已傳出車路士會喺法甲摩納哥收購巴卡約高，而正式官宣前其實路夫斯捷克都經已有好幾間球會希望租借佢，其中包括修咸頓、紐卡素同白禮頓，而最終藍軍同水晶宮達成租借協議。不論係由季初所帶領既法蘭迪保亞定係依加既鶴臣，都一直比到龍虎切喺塞爾赫斯特公園球場有穩定既上陣機會，可惜既係佢過往都係傷患較多既球員，不幸地喺下半季經歷左一段長達兩個幾月既養傷期，更返回到車路士接受治療，但水晶宮並未有取消佢既租借合約，見得到英格蘭人喺佢地心目中存在一定位置。
無疑路夫斯捷克喺水晶宮得到唔少成長機會，希望佢能夠珍惜並且繼續進步，史丹福橋正等著你回來。
文章最後更新時間 : 31/03/2018 09:00
《原創文章 歡迎轉載 請列明出處 謝謝》