世界盃經已完滿結束，備受香港大眾討好既英格蘭以第四名結束今次俄羅斯之旅，哩隊陣容相當平凡既三獅軍團拎到哩個成績絕對係超額完成，亦正好喺哩個時間，為佢地其中一名球員以寫文形式留一留倩影，佢就係效力李斯特城既後衛麥佳亞。
可能你未睇世界盃之前，即使你睇開英超，都未必知道麥佳亞係邊個，上季由降班既候城轉投到李斯特城，可以話係一單相當之實用既交易，麥佳亞完全頂替到喺候夫缺陣下對李城既影響，再加上摩根既速度同體能都隨著年齡下降，「蜜瓜」既加盟絕對係一個好好既接班人選。上季佢為李城喺各項賽事上陣超過40場，獲得2入球3助攻，無論表現同發揮都相當理想，更加吸引到英格蘭主帥修夫基既目光，將佢帶入到三獅軍團之中。
麥佳亞用波能力強，同時擁有後上前插既能力，元素上同大衛雷斯相近，而且制空力不俗，所以經常發現佢喺角球攻勢時頭槌爭頂成功。不過外界普遍認為麥佳亞只會喺英格蘭國家隊中擔當後備既角色，始終相同位置之下各個隊友都係喺豪列強效力緊，反而結果卻令人相當意外，麥佳亞竟然能夠擊敗左效力曼聯既鐘斯同車路士既卡希爾被修夫基列入正選既名單當中，加上以佢喺世界盃既表現，更可以話比起拍檔史東斯更為穩陣。
一戰成名，近日有傳經已受到曼聯領隊摩連奴既目光所注視，相信唔單止紅魔鬼，好多缺少穩定後衛既列強都想將佢收歸旗下，依加先二十有五，未來仲有大把時間同發展空間，假以時日必定成為統領三獅軍團後防既重要一員。
兩年前同朋友睇英格蘭踢歐國盃，兩年後朋友睇佢踢世界盃。
平凡的英格蘭帶著一點不平凡，請記住佢，佢叫麥佳亞。
文章最後更新時間 : 17/07/2018 13:15
Facebook Comments