梅桑達，一個早幾年被譽為有「新夏薩特」之稱既比利時妖人，一度給予車路士球迷對未來鋒線充滿希望，可惜既係無論你幾好波都好，只要品格態度唔好，一樣難以生存於大球會之中。而梅桑達正正表現出一個典型「長不大的小孩」既人板比到大家睇。
2012年，當時只有15歲既梅桑達正式加入車路士青年軍，加盟頭果幾季先後為藍軍U18、U21、U23梯隊上陣，當中更有一季被外借到西甲球會皇家貝迪斯吸取經驗，可惜最終都因為傷患，只係喺西甲交出一個助攻就提前完結左外借返回倫敦。而返到黎之後藍軍既主帥都變為干地，比利時人亦決心留在車路士力爭一席，但論能力排位，同樣位置上有夏薩特、柏度、韋利安等好手，令梅桑達就只能喺一啲本土盃賽賽事中上陣。
正所謂「年青人切忌心浮氣躁」，尤其係生存喺大球會底下更要明白哩個道理，但明顯自視過高既梅桑達向傳媒炮轟球會同干地，表明自己有能力以正選上陣，並且指出球會肯留低我但又唔比機會我，而高層當然亦無強人所難，立即幫佢搵一啲心儀球會希望達成外借轉會。以梅桑達既質素，其實絕對有能力喺英超中下游既球隊當中爭取正選上陣機會，而的確有一啲英格蘭球會對佢有興趣，但比利時人最終選擇既係外借到些路迪兩季，試問蘇超所吸取既經驗能夠幫助得到佢成長幾多？真係令人摸不著頭腦。
既然唔借都借左，咁唯有祝佢一路順風真係學有所成既返黎，加盟些路迪既第二場波經已有正選機會，但佢唔單止無入波助攻，球隊更喺佢正選哩兩場波失分，而領隊羅渣士亦因球員態度問題隨即將佢放在冷板凳上，就連後備席位都無，梅桑達當然對此舉感到不滿，更好快將社交媒體上所有關於些路迪既相都刪除，最終本身長達兩年既外借期再次提前縮短到半年就完結。
梅桑達短短兩季既舉動可以話真係「世界級」，球迷們對佢既期望亦開始走到盡頭，而佢今季亦低調地外借到車路士喺荷甲既衛星球會維迪斯，由西甲再到蘇超經已有好大落差，依加連蘇超都踢唔掂要去荷甲，「長不大的小孩」似乎喺車路士既生涯都要到尾聲了。
文章最後更新時間 : 07/09/2018 14:00
《原創文章 歡迎轉載 請列明出處 謝謝》