仲記唔記得對上一個能夠立足喺車路士前線既英格蘭人係邊個？或許你都要花點時間勾起回憶，始終藍軍隊內嘅英軍小之又小，更要只數到攻擊線上的話，你亦可能只記得有當年既祖高爾，而佢卻喺每個藍軍球迷們嘅心目中都無一個重要地位，正正係今集主角想講嘅主角，史杜列治。
史杜列治出生自球員世家，父親同舅父都係司職前鋒嘅職業足球員，喺哩個環境成長下嘅佢亦立定決心將來要成為一位出色嘅正中鋒，先後加入過吉百利體育會、阿士東維拉及高雲地利成為青年軍，由於當時表現出色以及睇得到發展潛力，最終被英超球會曼城以3萬鎊培養費正式買斷，同時佢喺曼徹斯特市度過左佢成長期嘅6年時光，當中可以話獲益良多。
曼城可以話成為咗史杜列治嘅家，但佢最後亦選擇出走加盟車路士，主要原因係當時既曼城經已成為富豪球會之一，而隊中能夠擔任前鋒嘅人數多達8人，史杜列治清楚自己嘅實力去到邊，即使以其他攻擊位置上陣嘅機會亦唔會多，哩個時候車路士開出合約，加上獲答應有一定上陣機會，以一個年青球員嚟講冇嘢比上陣吸取經驗更重要，史杜列治離開亦屬情有可原。
喺史丹福橋哩4年間，史杜列治上共為藍軍喺各項賽事上陣96場，攻入24球，得到嘅奬盃包括英超冠軍、足總盃冠軍以至歐冠盃冠軍，更令佢晉身成為英格蘭國家隊，一嘗大國腳滋味，實現咗母親嘅夢想。但喺背後史杜列治似乎過得並唔開心，藍軍主要安排佢以翼鋒位置上陣，由於當時車路士有傳奇杜奧巴同浪子安歷卡坐擁正中鋒位置，加上後來費蘭度托利斯由利物浦轉投加入競爭，史杜列治並唔能夠如願以償擔任前鋒，佢亦選擇離開加盟利物浦。
由當年嘅黃毛小子，到今日都經已二十有九，要不是傷患所侵蝕，史杜列治嘅成就絕對不止於此。
文章最後更新時間 : 27/09/2018 15:15
《原創文章 歡迎轉載 請列明出處 謝謝》
Facebook Comments