正所謂新人事新作風，自沙利今季掌帥後，車路士由過去兩季主守既三後衛陣式，搖身一變為一個能夠與利物浦對攻而不敗既433陣式，而上季迷失既巴克利亦喺意大利人既調教下慢慢得到機會重拾他日信心，有得必有失，反之亦然就好似域陀摩西斯哩啲喺三後衛陣式中既得益者，依加就只能回歸平凡，再次折返人間。
其實摩西斯都可以算係依加隊中既老臣子，2012年車路士傳奇式奪得歐聯冠軍後，球會一氣過收購多名技術型球員，就好似夏薩特、奧斯卡等，而摩西斯就係其中一員，當時佢由仲喺英超既韋根加盟後第一季的確有唔少出場機會，雖然天賦唔係高，但勝在夠勤力，果時仲係翼鋒既佢為藍軍喺各項賽事上夾夾埋埋都入到十個波，更助球隊成為應屆歐霸盃冠軍。
不過環境好快就受到改變，摩連奴再一次回歸史丹福橋，而名氣不及其他邊路攻擊球員既摩西斯正式加入人強馬壯既外借軍團，喺三季內先後被外借到利物浦、史篤城同韋斯咸效力，但係喺各支球隊身上都拎唔到穩定既正選位置，所以每季完結後都會番去車路士參與季前操練無被賣斷，如是者一季接著一季，好快就黎到加盟藍軍既第五季，而主帥亦由摩連奴轉變成干地。
喺干地手中，可以話將摩西斯活用起上黎，尼日利亞人速度夠氣力好，加上勤力肯博肯賣命，硬爆過你就過你唔會做多，令干地情願放行古亞達度返回意甲都選擇留番質素上次一級既摩西斯，而唔少英超球隊見到哩個成功例子之後，亦開始將一啲隊中本身進攻能力唔太高既翼鋒開始改造成轉打翼衛或者閘，摩西斯絕對可以話係一個「中流質素打上流波」既人板。
但喺沙利手下，摩西斯既翼衛光環亦開始顯得暗淡無光，由於右閘位上經已存在艾斯派古達作正選，以及薩柏哥斯達為後備，令摩西斯需要變回兩年前既翼鋒作定位，但其實喺同樣位置上都經已有韋利安或柏度作後備，摩西斯拍埋去喺各方面都差咁啲咁，顯得相當平庸，亦因為咁導致上陣機會少之又少，更開始傳出黎緊一月會離隊他投。
也許過去哩兩季就像一個夢，一醒來就發現自己經已折返人間。
文章最後更新時間 : 24/10/2018 12:00
《原創文章 歡迎轉載 請列明出處 謝謝》